جمل عجبتني في كتاب عمرو سلامة "شاب كُشك"

أنا دلوقتي بقرأ في كتاب عمرو سلامة "شاب كُشك" وصراحة عجبني جداً ولحد دلوقتي في أربع فقرات عجبوني أوي في الكتاب.

"سياسة الترغيب والترهيب موجودة في الدين ، مين فينا بيصلي علشان بيحب ربنا ومستمتع بوجوده ومتصل بيه؟ وكام واحد بقي بيصلي لإن تفاصيل النار محفورة في عقله بكل تفاصيلهت وخايف من عذاب القبر؟ مع إن ربنا في القرآن ذكر الجنة وأغرانا بيها أكتر من ما ذكر النار ، وكان بيذكر الجنة الأول لأنها الإصل ، وقالنا ناخدها معاه تجارة لإن تجارة الله بتكسب أكتر من تجارة الدنيا."

"وبلاش نعمل من الأراء مسلمات ، مش لمجرد إن الأغلبية ماشية ورا الرأي ده إنه قانون ، الأغلبية في وقت من الأوقات كانت موافقة إن الأرض مسطحة والأغلبية الألمانية كانت مقتنعة إن هتلر هو منقذ البشرية ، وأغبية المصريين أهلاوية!"

"فيه جملة طول عمري بحبها قوي مع إنها طلعت من شيخ من شيوخ الزعيق الجامد بس أنا شايفها عبقرية ، مرة واحد راح قال له هو الإنسان مسير ولا مخير فهو رد الرد الآتي ..
كل شوية واحد ييجي يسألني نفس السؤال ، وأنا زهقت من الإجابة عليه فأنا هجاوب عليه آخر مرة ، الإنسان في العالم كله مخير ولكنه في مصر مسير ، لإن الإنسان في العالم كله بيختار جامعته ، بيختار زوجته ، بيختار شغله وحتي بيختار دينه ، لكن هنا في مصر الواد من دول يتولد يحطوا المعلقة في بقه ويقولوا (كل) يقوم الواد ياكل غصب عنه ، بعدها (خش إتعلم) بعدها (هات مجموع) (خش كلية قمة) (إتخرج) (إشتغل) (إتجوز ده علشان بنت حلال) (خَلِف) (إجبر عيالك علي نفس اللي إنت إتجبرت عليه بالترتيب) لحد ما عيالك يسيبوك ويتجوزوا ويكون عندهم حياتهم ويسيبوك وحيد ، ساعتها إنت تلاقي نفسك لوحدك من غير صوت يقولك تعمل إيه ، وإنت تقعد تسإل العدم (وبعدين؟ أعمل إيه؟) ممكن تلاقي الصوت بيرد عليك علشان يقولك (موت) لإنه مش هيلاقي حاجة ثانية يقولهالك.

"مش لازم تخلص طبقك ، ممكن تغرف لنفسك علي قد جوعك ، مش لازم تخش علمي لإنك ممكن تكون بتميل للأدبي ، مش لازم تخش كلية قمة لإن كل حكام مصر وأعلامها كانوا من كليات درجة ثالثة ، مش لازم تتجوز واحدة ما صحبتش قبل كده ومحجبة وبتزور دار الأيتام مرتين في الإسبوع لأنها ممكن تطلع نكدية وسمّاوية وبتمثل ، ومش لازم تشتغل في شركة مالتي ناشونال لإنك ممكن تفتح عربية سجق وتكبر وتبقي سلسلة مطاعم عالمية وتبقي مبسوط بيها ، ليه؟ لإن كل ماتش وله ظروفه."